Ещё

Чинчийэр үлэни ыытыахтара 

Чинчийэр үлэни ыытыахтара
Фото: ЯСИА.RU
Сунтаар улууһун Куокуну нэһилиэгэр « геологоразведка» ХЭУо үс бэрэстээбиитэл кэлэн олохтоохтору кытта көрүстүлэр. Ол төрүөтүнэн нэһилиэктэн 180 км тэйиччи сытар сиргэ гаас, ньиэп саппааһа баара, сир нэһилиэк территориятыгар сытара буолар. Онон тустаах сиргэ үлэни ыытар тэрилтэ хайаан даҕаны олохтоох нэһилиэнньэни кытта көрсөн туох-ханнык үлэ барыаҕын туһунан билиһиннэрэр эбээһинэстээх. Көрсүһүүгэ «Газпром геологоразведка» тэрилтэттэн Илин Сибииргэ геологоразведка үлэтин тэрийэн ыытар управление начаалынньыга Евгений Белюскин, тэрилтэ генеральнай дириэктэрин регионнары кытта үлэҕэ көмөлөһөөччүтэ Олеся Байкова (иккиэн Красноярскайтан) уонна отдел начаалынньыгын солбуйааччы () кэлбиттэр. Көрсүһүүгэ улуус дьаһалтатыттан баһылыгы бастакы солбуйааччы кытынна.
Ыытыллыахтаах үлэ туһунан кэпсэтии олохтоох дьону барыларын улаханнык долгутар буолан, үгүс киһи муһунна. Мунньаҕы нэһилиэк баһылыга Леонид Михалев иилээн-саҕалаан ыытта. Бастаан утаа Олеся Байкова уонна Евгений Белюскин ыытыллыахтаах үлэ ымпыгын-чымпыгын туһунан слайданы көрдөрө-көрдөрө кэпсээтилэр, быһаарыылары биэрдилэр. Ол курдук, тустаах учаастакка алта скважинаны үүттүүр былааннаахтар. Үлэ олунньуттан саҕаланыахтаах. Тэриллэрин аҕалан туруоралларыгар кытары элбэх бириэмэ барарын эттилэр. Онон скважиналары үүттүүр үлэ аны сайыҥҥыттан саҕаланыа диэн буолла. Онно барыта 40-тан тахса киһи үлэлиэхтээх эбит. Евгений Владимирович тустаах учаастакка үлэ 2019 сылга түмүктэниэхтээҕин этэр. Быһаарбыттарынан ити бириэмэҕэ сирин баайын саппааһа чуолкай биллиэхтээх. Хостооһунун Газпром атын структурата ыытыахтаах. Кинилэр чинчийии, разведкалааһын үлэтин эрэ толороллор.
Олохтоохтор «айылҕаҕа, кыылга-сүөлгэ хоромньуну оҥоруохтара суоҕа дуо» диэн саамай долгуйар, дьиксинэр ыйытыыларыгар, ыалдьыттар бары экологическай нуормалары тутуһан үлэлииллэрин тоһоҕолоон эттилэр. Өссө улуус, нэһилиэк территориятыгар үлэлиир кэмнэригэр, тэрилтэ олохтоох бүддьүөккэ нолуок төлүөхтээҕин иһитиннэрдилэр.
Кылгастык билиһиннэрдэххэ, «Газпром геологоразведка» ХЭУо Арассыыйа үрдүнэн сир баайын көрдөөһүҥҥэ үлэлиир. Ол курдук, сиригэр Чайыҥдатааҕы ньиэп, гаас баар сирин чинчийиигэ үлэлэспиттэр. Дойду үрдүнэн барыта 14 муниципальнай оройуону кытары, ол иһигэр биһиги улууспутун кытта, бииргэ үлэлэһэр туһунан Сөбүлэһиигэ илии баттаспыттар.
Банки России сократили доходность по счетам в евро
Комментарии
Читайте также
Новости партнеров
Больше видео