Таатта улууһун сайдыытыгар дьоһун кэпсэтии ыытылынна

СӨ экономика миниистирин солбуйааччы Владимир Сивцев салайааччылаах СӨ судаарыстыбатын ситэриилээх былааһын уорганнарын бэрэстэбиитэллэрин оробуочай бөлөҕө Тааттаҕа улуус социальнай-экономическай сайдыытын торумнуур бырайыактарга нэһилиэктэр баһылыктарын, тэрилтэлэр салайааччыларын, сүрүннүүр исписэлиистэрин кытта көрүстүлэр. Бөлөх улуус билиҥҥи социальнай-экономическай балаһыанньатын билистэ, үлэни сүрүннээһиҥҥэ практическай-методологическай көмөнү оҥорууга үлэлэстэ. Үлэҕэ өрөспүүбүлүкэтээҕи «Миниистир» дьыалабыай оонньууга кыттыбыт эдэр салайааччылар, исписэлиистэр кытыннылар. Бэрт сэргэх кэпсэтиини, тренини ыыттылар. Бөлөҕү салайааччы В.М.Сивцев этэринэн, маннык үлэлээһин тыа сиригэр сайдыы тосхоллорун бырайыактарынан оҥорон олоххо киллэриигэ көдьүүстээх. Билиҥҥи тэрээһин үлэ бастакы эрэ түһүмэҕэ. Салгыы салайааччылар, исписэлиистэр бэйэлэрэ үлэлэһиэхтээхтэр. Торумнаммыт, оҥоһуллубут бырайыактары дьүүллэһэри таһынан, олоххо киирэр өрүттэрин көрүүгэ үлэ барыахтаах. Итинтэн тирэҕирэн, баар кыахтары таба туһанан, саҥа хамсааһыннарга тахсыы буолуохтаах. Тэрээһиҥҥэ улуус баһылыга М.М.Соров, депутаттар улуустааҕы Мунньахтарын бэрэссэдээтэлэ В.А.Охотин, улуус дьаһалтатын салааларын начаалынньыктара, исписэлиистэрэ кытыннылар.