Суһал көмө саҥа массыыналанна

Сунтаарга суһал көмөнү оҥорор отделение 16 үлэһиттээх. Манна уопсайа биэс суоппар, биир санитарка уонна уон биэлсэр үлэлии-хамсыы сылдьаллар. Бу отделениеҕа үс массыыналаах, олортон биирдэстэрэ – соторутааҕыта саҥа кэлбит “Б” кылаастаах УАЗ массыына. Массыына сүрүн уратыта – ыарыһахха суһал көмөнү айаннаан иһэн тутатына оҥорорго сөптөөх тэриллээҕэ буолар. Суһал көмөнү оҥорор отделение сэбиэдиссэйэ Степан Николаев: – Саҥа массыыналанан отделение, балыыһа үлэһиттэрэ бары олус үөрдүбүт. Икки мөл. солк. тиийэ сыаналаах көлө федеральнай бырагырааманан көрүллүбүтэ. Маннык массыыналар атын улуустарга биирдиилээн эмиэ кэлбиттэрэ. Саҥа көлөбүтүгэр ИВЛ аппараата, дефибриллятор, монитор, электро-кардиограф, глюкометр, компрессорнай ингалятор, шина арааһа, «кислородник», наһыылка арааһа, илии суунар раковина о.д.а. тэриллэр бааллар. Биллэн турар, бу барыта ыарыһахха суһал көмөнү оҥорорго олус наадалаахтар. Онон дьэ, ыраах нэһилиэктэрбитигэр, аҥардас Сунтаарбытыгар ыксаллаах быһыыга-майгыга көмөнү оҥорорго туһалаах буолара саарбахтаммат. Итини сэргэ, массыына иннигэр-кэннигэр сиреналаах, «мигалкалардаах», сайыҥҥы куйаас күннэргэ суоппарга, биэлсэргэ уонна ыарыһахха анаммыт кондиционердаах, тула өттүнэн светодиоднай лаампалардаах, кыһыҥҥы тымныыга массыына мотуорун сылытар тэриллээх. Урукку массыыналарга, атын уазиктарга маннык көрүллүбэт. Инньэ гынан, бу массыынабыт үлэһиттэргэ да, ыарыһахтарга да абыраллаах. Инникитин бу курдук дьону эмтииргэ саҥа үйэ ирдэбилигэр эппиэттиир тэриллэр да, техника да кэлэ туруо диэн эрэнэбит.