Саҥа дьиэлэр Өймөкөөн тымныытын тулуйдулар
Өрөспүүбүлүкэ үрдүнэн хаарбах дьиэттэн дьону көһөрүү бырагырааматын чэрчитинэн сөптөөх үлэ ыытылла турар. Хоту улуустартан Өймөкөөн улууһугар бу бырагырааманы олоххо киллэрии үчүгэйдик барар. Өрөспүүбүлүкэҕэ биллэр-көстөр «Стройкон” ХЭУо Уус Ньара бөһүөлэгэр 2014-2015 сылларга тимир тулааһынннаах саҥа ньыманан 24-түү кыбартыыралаах 7 дьиэни тутан үлэҕэ киллэрбитэ. Быйыл олунньуга маннык тутуллаахх алта дьиэ тутуутун саҕалаан, төрдүс кыбаартал бүтүөр диэри үлэҕэ киллэрээри туруулаһа сылдьар. Мантан иккитэ сэтинньи 29 күнүгэр үлэҕэ киирэн, анал бырагыраамаҕа хапсыбыт ыаллар саҥа кыбартыыраларын күлүүстэрин ылан, Саҥа дьылы саҥа дьиэҕэ көрсүөхтэрэ. Өймөкөөн улууһун баһылыга Михаил Захаров: «Маннык тимир тулааһыннаах дьиэлэри кириисис кэмигэр хоту улуустарга тутары саамай табыгастааҕынан ааҕабын. Эрдэ туталлан үлэҕэ киирбит дьиэлэр Өймөкөөн тоһуттар тымныытын тулуйдулар. Сылаастарын толору итэҕэттилэр. Саамай сүрүнэ, хоту улуустарга олорор дьоҥҥо дьиэ сылаас уонна сырдык буолуохтаах», – диэн бэйэтин санаатын үллэһиннэ.
